خفقات قلب لكل البشر

المرة دى المشكلة تخصنى !!!!!

2008-04-23T03:47:00.000-07:00

وحشتنى اوى الكتابة هنا فى البلوج مش قادرة احكيلكم ازاى انا مفتقدة وجودى هنا مش بس هنا لأ كمان فى وسط الناس.

الفترة الى فاتت انا الحقيقة بعدت عن حاجات كتير كنت محتاجة اراجع نفسى اراجع تصرفاتى واختياراتى وكل حاجة تخصنى . بتهيألى كلنا بنحتاج للوقف دى مع نفسينا كل واحد بيحتاج يوم يراجع فى حساباته زى مابيقولوا بس المشكلة الى وجهتنى هى بعد مراجعة النفس هل فى شيء هيتغير هل كل الى نفسى اعملوا هعملوا فعلا .

بصراحة انا عندى مشكلة ناس كتير بتشوفها حاجة كويسة بس انا الموضوع ده ابتدا يتعبنى ، هو انى عندى قناعة زائدة جدا ورضا قوى جدا بكل حاجة انا فيها طبعا كتير منكم هيقولوالى هايل وهو حد لاقى ، بس فى الحقيقة لما نبص للموضوع من جهة تانية انا كده بيحصلى حالة انى مش محتاجة اتغير وانى كده كويسة مع انى فيا زى كل البشر عيوب ومحتاجة اغيرها ولو مكنتش حسة بالمشكلة دى عمرى ماهغيرها ، انا فى نفس الوقت دقيقة جدا فى محاسبتى لنفسى من ناحية شخصيتى يعنى فى دى انا قوية مع نفسى لما بحس ان حد بينتقض في حاجة "فى شخصيتى" بقعد كده مع نفسى احاول اتأكد من الكلام ده ولو حسيت انهم صح بعدل من نفسى على طول .

لكن مثلا لو حاجة فى حياتى ممكن احسنها علشان بيتى مثلا يبقى احسن مبهتمش بقول وهو كده ماله، مش مشكلة لو مثلا زوجى العزيز عمل حاجة مش عجبانى بحاول اقولوا انه غلط بس مش بحب اعمل خناقة ليه لأنى عندى قناعة أن كل الرجالة فيهم عيوب زى الستات فمش مشكلة ، لو فى شغلى مثلا فى حد لقيته احسن منى مش بضايق كده وأتنحرر علشان ابقى أحسن لأ بقول والله كويس برافو عليهم ، طيب وانا ، والدتى دايما كانت تقولى من ايام المدرسة والجامعة أه هو أنتى مش بتغيرى ان أصحابك يكونوا أحسن منك أقولها لأ أنا مبسوطة ليهم ربنا يكرمهم كمان وكمان .

فى ناس من فترة قالولى كلمة غريبة اوى وهى أنى كده أبقى سلبية ، تفتكروا أنى أصبحت سلبية تجاه كل شىء والا هى دى فعلا القناعة الى مفروض تكون جوانا مش عارفة أنا فجأة حسيت أنى مش بسعى لشىء دايما حسة أن ربنا هيعملى فى أى حاجة الخير وأن لو ربنا كاتبلى حاجة هتحصل من غير ما أجرى وراها ، تفتكروا انا صح والا غلط .

ملحوظة ::::::::: المرة دى المشكلة تخصنى ياريت تقولولى أعمل ايه؟؟؟؟؟؟

أيه رأيكم فى الصراحة والصدق والشفافية......

2008-03-05T23:40:00.000-08:00

صباح الخير على كل القلوب

أيه رأيكم فى الصراحة والصدق والشفافية....ألخ من هذه الكلمات التى تعبر كلها عن معنى واحد وهو الصدق .

طبعا زمانكم هتقولولى ياه ده موضوع قديم اوى انتى لسه فاكرة ، ده الناس كلها بتتكلم فى الموضوع ده من قديم الأزل ، بس طبعا أنتم أكيد زمانكم فهمتونى وعرفتم أنى هاجيب الموضوع من ناحية تانية.

أنا بقى عايزة أناقشكم فى الصراحة والصدق من ناحية الأحساس، يعنى هل الصراحة والصدق بتريح الواحد وبتريح الى حواليه والا بتتعبهم وهل ليها حدود يعنى الصدق بين الأهل زى الى بين الأزواج زى الى بين الأصدقاءأو الزملاء فى العمل ، وهل أحنا فعلا بنكون دايما صادقين، ولو أحنا فعلا كده أيه تأثير ده على الى حوالينا ولو مش كده برده ألى حوالينا أحساسهم ايه؟؟؟

أنا رأى بقى فى الموضوع ده جايز ميعجبش ناس كتير لكن هقولوا أمرى الى الله، أنا شايفة أن كل حاجة محتاجة لحدود، بس طبعا قبل كل شىء أنا عارفة تماما أن الكذب حرام، لكن فى أوقات الصدق فيها بيكون مؤلم لناس عزاز علينا، يعنى مثلا مع أهالينا يعنى ماما وبابا مينفعش نروح زى الشاطرين كده نقولهم لأ أستنوا عندكم أنا عايزة أقولكم على الحقيقة أنا مش مرتاحة معاكم وانتم خنقتونى وكل ألى أنتم بتعملوه مش عاجبنى ، بذمتكم ينفع ؟ ده كلام مهو ده برده حرام يعنى ، بعد أما طلع عينهم وعملوا الى يقدروا عليه علشان يربونا نيجى أحنا بكل بساطة نقولهم كلام حتى وإن كان صحيح فهو مؤلم وقاتل ليهم. ده بالنسبة للأهل ، نيجى بقى للأزواج ، تيجى الزوجة مش عاجبها مثلا حاجة جوزها لابسها فتقوم تقوله أيه ده الى انت لابسه ده وحش أوى ، أو ياسلام لو جابلها هدية ومعجبتهاش تقوم ترصله بقى قايمة من الكلام الى ملوش لازمة. وطبعا نفس الكلام بالنسبة للأصدقاء والزملاء مش كده.

أنا بقى بتبع أسلوب بحسه لطيفة جايز ميكونش بيريح بس على الأقل مبيجرحش ، أنا بقى مش بسكوت اوى على اى حاجة ولو فى حد سألنى رأى بصراحة بقول فعلا الحقيقة بس زى مابيقولوا بدبلوماسية يعنى بشوية لباقة بشوية تجميل بس المهم انه يوصل مش كده.

واضح طبعا أنى رغيت كتير أحكولى بقى أنتم بتعملوا ايه بس مش بختصار أحكم براحتكم.

أيه رأيكم فى الموضوع ده؟؟؟؟

2008-01-13T06:11:00.000-08:00

المرة دى أنا مش هعرض عليكم مشكلة لكن أنا لقيت أن فى حاجة ممكن نتكلم فيها ونقول كلنا رأينا فيها خصوصا أن فى أراء كتير حول الموضوع ده

أقولكم بقى ايه الموضوع ، أحنا عايزين نتكلم عن المشاكل النفسية والمعنوى ألى الناس بتواجها فى أعمالها يعنى أكيد كل واحد فينا بيشتغل بيتعرض لمشاكل كتير إن كان من مدير العمل، من الزملاء، من ضغط الشغل نفسه . يعنى المشاكل كتير ومالهاش عدد لكن أنا شخصيا بشوف أن أسوء المشاكل هى المشاكل الأخلاقية من أى شخص حوالينا ان كان مدير أو حتى غفير، يعنى تلاقى ناس بيذموا فى ناس ، وناس تانية بتضرب فيك وأنت لابيك والا عليك عند المدير أو عند زمايلاك، والواحد كل أما يكون فى حاله كل أما تلاقى ألى بيضربوا فى أكتر مش كده وبس لأ تلاقى كمان ناس بيتلزقوا للمدير بشكل أو بأخر علشان هما الى يكونوا حلويين ويوصلوا الكلام الى هما عايزينوا عن الناس ألى بيحبوهم أو بيكرهوهمو حاجات تانية كتير من النوع ده.

الحقيقة حاجة غريبة أوى أنا مش عارفة رأيكم أيه فى الموضوع ده، ياريت تحكولنا عن المشاكل الى بتقابلكم وانا كمان هحكلكم .

وياريت كمان نقول ممكن من وجهة نظرنا نعمل ايه نقلل بيه ونغير بيه المشاكل دى فى جميع أنواعها.

كل عام وكل عيد أضحى وأنتم بخيرأعاده الله علينا بالخير

2007-12-19T02:22:00.000-08:00

مشكلة تخص أنساتنا العزيزات

2007-11-15T00:23:00.000-08:00

اليوم سأعرض عليكم مشكلة جديدة ، وللحقيقة هى ليست مشكلة واحدة ولكنهم مشكلتين متشابهتين فقررت لعدم التكرار عرضهم عليكم معا خاصة وأنهم نوع واحد من المشاكل

هذه المشاكل التى سأعرضها عليكم متواجدة كثيرة بين أنساتنا العزيزات والمشكلة عبارة عن كيفية أختيار شريك الحياة، ولكى أكون أكثر دقة سأحكى لكم المشاكل التى طرحت عليا

أول مشكلة

انا فتاة فى ال29 من العمر ولم أتزوج الى الأن وده مش بسببى لكن بسبب ان شريك الحياة المناسب مجاش لسه، ولكن عائلتى تصعب عليا كل يوم حالى خاصة فى حالة دعوتنا لحفل زفاف أو خطوبة بيتكون ليلة مش معديا ، وهما للأسف مش مستوعبين ان ده فعلا بيأثر على نفسيتى وأنهما بالشكل ده بيضغتوا عليا وانا ماليش ذنب وحتى لما اى عريس بيتقدم بيقعدوا يقتعوا فيا وانا والله ببقى ساعات حسة انهم بيقنعوا نفسهم اكتر مابيقنعونى مش فاهمة هما ليه مكبرين الموضوع بالشكل ده انا فعلا زمان كنت بضايق لكن من فترة انا قررت انى مش هموت لو ماتجوزتش وانى لازم اعيش حياتى وحاولت انى اركز جدا فى شغلى وحاولت انى اخد كورسات واشغل نفسى طول الوقت بس للأسف من وقت ماعملت كده وانا اهلى بيضغتوا عليا زيادة مش فاهمة ليه مع انهم المفروض يفرحوا انى مش مضايقة لكن العكس هو الى حصل انا مش عارفة اتفاهم معاهم وكل يوم مش بيعدى من غير مشاكل هو انا يعنى لازم اوافق على اى عريس يجى حتى لو مش مرتاحاله علشان اريحهم وخلاص قولولى اتصرف ازاى؟؟

تانى مشكلة

انا عندى 31 سنة بعمل فى شركة كسكرتيرة الحمد الله ربنا انعم عليا بشكل حلو ، لكنى مع ذلك مازلت أنسة ، انا اتقدملى ناس كتير جدا بس انا ملقيتش الأنسان الى يريحنى وأرتحله ولما ارتاح لشخص ألاقيه ساعة الجد والجواز مش جاهز مش مستعد وكلام كتير من الى الواحد بيسمعوا ده بقى غير ان أغلب الرجالة بتبصلى بشكل مش كويس وبطمع حتى المتجوزين

انا نفسى اتجوز عن حب لكن انا مش لاقيا الحب ده ومش عارفة اوافق على الجواز بتاع الصالونات ده مش قادرة استوعب فكرة انى ممكن ارتبط بواحد معرفش عنه حاجة، وطبعا أهلى مش سايبينى كلام كتير فى الموضوع ده شبه يومى زى ماأكون أنا السبب ولما اقول لأ على اى عريس يقعدوا يقولولى انتى بتتبطرى على النعمة وكده حرام عليكى شوفى الناس وبعدين ابقى ارفضى مينفعش الى انتى بتعملى ده

هو انا كده ابقى غلطانة انى كل الوقت ده بدور على الحب أجى دلوقتى وأوافق على جواز من النوع ده انا مش عارفة اعمل ايه؟

أعتذار و حل للمشكلة

2007-11-04T05:53:00.000-08:00

وحشتونىىىىىىىىى جدا بجد أنا أسفة أوى أنا بقالى كتير أوى مكتبتش وخصوصا أنى مرديتش على المشكلة ألى أنا كنت عارضاها بس على فكرة انا اصلا رديت على صاحبة المشكلة من اول مابعتتلى لكن أنا كنت حبة انى اسيبكم تقولوا رايكم الأول وبعدين أقول أنا رأى، وللأسف حصلت عندى ظروف منعتنى من أنى أقدر أدخل و أكتبلكم، بس الحمد الله أنا رجعت تانى
ده كان الأعتذار أما الحل ألى أنا أرسلته لصاحبة هذه الشكوى هو:ا
ألى أختى الغالية
أنا أعلم مرارة هذا الأحساس ربنا يبعده عنكى وعن كل القلوب التى تضحى من أجل وجود أسرة سعيدة، ولأنى من كلامك أحس مدى أرتباطك بهذه الأسرة خصوصا وأنهم كل مالديك فعلييكى أن تفكرى بطريقة مختلفة أنا أعلم أنه من المحتمل أن لايعجبكى كلامى ولكن لن تخسرى شيئا ، لابد لك قبل كل شيئا أن تقومى بمحاسبة نفسك هل الأولاد أخذوا وقتكى كله ولم يعد لديك انتى وزوجك وقتا ؟ هل تحاولين أشراك زوجك فى تربية الأولاد ورعايتهم؟ هل زوجك لايعانى من الفراغ والوحدة؟
ولابد ان تكونى صريحة تماما مع نفسك لأن أجوبة هذه الأسئلة ستساعك كثيرا فى حل مشكلتك، مع العلم أن هذا الكلام لايقلل بأى شكل من كونك أما عظيمة وزوجة ولكن العديد من الزوجات عندما يصبحنا أمهات ينسون أن للزوج هو الأخر حقوق خصوصا عند تحمل المرأة لكل أعباء الأسرة والأولاد ، لابد أن تشركيه معكى فى أمور الأسرة أجعليه دائما على علم بما يحدث ، حاولى أن تتركى له بعد الوقت منفردا مع الأولاد لتفعلى شيئا أخر، الرجال يا عزيزتى على عكس مايقولون لايحبون الفراغ . ثانى حاجة لابد أن تجدى بعض الوقت لكى مع زوجك ، على فكرة ده مش ليه هو بس لأ ده ليكى انتى كمان ، جميل انك تحسى انك مازلتى أنثى فى بيتك ولستى فقط أما ، مع علمى التام بأن دور الأم أجمل وأعظم دور فى الدنيا ، ولكن انتى وزوجكى لكم ايضا حقوق المودة والألفة و التراحم فى مابينكم. عسى أن يصلح الله بينكم
ولاتحزنى فأغلب الرجال يمرون بهذه النزوات ولكن ساعديه على التغلب عليها وأنا لاأنصحك بترك البيت أو الأولاد فالحياة مليئة بالمشاكل فلا تجعلى هذه حدى عاداتك فمع الوقت سيجدها طريقة جيدة للتخلص من العيال ومنكى بأن يفعل شيئا يغضبكى وأن تذهبى وتتركيه حاولى ولاتيأسى فكل محاولاتك عند الله وثوابها عند الله فمن يبنى بيتا بالحلال سيحفظه الله بأذنه

أول مشكلة نريد لها حلا.........

2007-09-25T01:35:00.000-07:00

هذه هى أول المشاكل التى سمحت لى صاحبتها أن أعرضها عليكم وأن نأخذ رايكم بها، لذلك أرجومشاركتكم جميعا من أجل مساعدة صاحبتها

أنا أمراة متزوجة منذ حوالى 5 سنوات ومنذ أن تزوجت وأنا جالسة فى بيتى بدون عمل وذلك بناء على رغبة زوجى ولقد رزقنى الله بولدين هما قرة عينى وزوجى يعمل على فترتين يعنى صباحا ومساء، و هو شبه غير متواجد معنا أغلب الوقت
احنا ككل العائلات المصرية عايشين اليوم بيومه ، وأنا والله ماطمعت فى اكثر من ذلك والحمد الله على كل شىء ، لكن منذ عامين حدث مالم أكن اتوقعه وهو أن زوجى يأتى له مكالمات غريبة فى أوقات أغرب يعنى الساعة 5 الفجر مثلا وده خصوصا لما يغيب عن عمله الصباحى أو ناخذ أجازة يومين ونسافر ، وبعدين أكتشفت ان الرقم ده رقم أحد زميلاته فى العمل وانا أعرفها منذ خظبتنا وهى غير متزوجة أو مرتبطة وسألته لماذا تتصل بك فى هذه الأوقات قولها أن كده ميصحش وكان رد فعله عجيب أعمل أيه أصلها غلبانة بتقعد تشكيلى عن حلها والله دى بتصعب عليا وكلام من هذا النوع وانتى كبرى دماغك وعموما انا طبعا هقولها ان كده عيب . وانتهى الموضوع فى وقتها بعد فترة اخرى من الوقت أكتشفت انها مازالت تتصل بيه وانه بدأيمسح عدد المرات الى هى بتكلمه فيها ، وبدات انفعل عليه خصوصا لما لقيته بيكلمها وهو ساعات تطلبه وانا ارد وعرفتها من صوتها ودمى غلى مقدرتش استحمل اتخانقنا والمشاكل ابتديت وهو كان رد فعله اهدى بس دى والا حاجة انتى اهم حاجة فى حياتى انتى والأولاد وانا مقدرش اعيش من غيركم وترجع ريمة لعداتها القديمة
ولكن منذ فترة صغيرة جدا لقيته غير نمرتها المشجلة على الموبيل وبقى فى رقم غريب غير محدد بيتصل بيه ولو رضيت يتقفل التليفون وطبعا بدات المشاكل مرة تانية وكنت ناوية اسيب البيت وامشى لكن لما فكرت قولت هروح فين بولدين أنا أمى متوفية رحمها الله ووالدى راجل مسن ومش بيستحمل الأطفال . أنا كنت بفكر أجيب نمرتها وادور فى شركة الأتصال على عنوانها او رقم تليفون بيتها واكلم أهلها وابهدلهم مش عارفة اعمل ايه انا هموت من الخنقة وعلاقتى بجوزى مش قادرة ارجعها زى الأول . ياريت تقولولى أتصرف ازاى بس أنا نفسى اخد بحقى بأى شكل

دى ياجماعة المشكلة المرسلة ليا أنا الحقيقة حاولت اختصر فيها شوية علشان الكل يقدر يقراها وياريت تقولولها على حل او حتى مجرد رايكم؟

اللهم تقبل منا رمضان

2007-09-12T01:49:00.001-07:00

الأحساس بالأمان هل هو حقيقة أم تخيلات؟؟؟

2007-09-02T06:33:00.000-07:00

الأحساس بالأمان ده أجمل حاجة فى الدنيا وقد أيه الواحد بيكون تعيس ووحيد ومكتئب من غيره ، الواحد دايما بيحب يحس بالأمان فى كل مكان هو موجود فيه فى بيته ، فى شغله ، فى مكان دراسته ، ومع كل الناس ألى حواليه يعنى مع أهله وأصحابه وحبيبه .

شىء رائع أن الواحد يحس بالأمان وخصوصا من أقرب الناس ليه لأن بجد الواحد من غير أمان بيسيطر عليه كل الأفكار السيئة مش بس كده لأ ده كمان تصرفاته مبتكونش فى أوقات كتير متزنة أو مظبوطة ،يعنى الواحد ميخدش عليه، لأن الأحساس بعدم الأمان بيصيب الواحد بالوحدة ودى أصعب حاجة فى الدنيا.

عارفين ياجماعة الأحساس بالأمان مش صعب أوى ، لأن أحنا ممكن نحس بالأمان من مجرد كلمات أو نظرات حنينة أو وجود حضن دافىء وحنون نترمى عليه وقت الشدة ووقت الخوف والحزن على أى شىء ومن أى حد، وده ممكن نلاقى مع أى حد فعلا قدر يفهمنا وعارف لحظات الضعف والحزن والحاجة لأن للأسف لو حتى الواحد ليه أصدقاء كتير لكن مش بيطمن لحد فيهم مثلا أنه يحكيلوه أو أنه يفرغ الطاقة الداخلية الى جواه معاه بدون خوف ده ميبقاش أمان على العكس ده فى أوقات كتيرة بيكون عبء على الشخص.

وللأسف فى ناس بتقعد تقول أمان أيه أنتى بتحلمى هو الزمن ده بقى فى أى أمان والا حد بيحب حد فعلا من غير مصلحة أو بيحافظ على أسرار حد ، ده كله خيال، تفتكره فعلا ياجماعة للدرجة دى الأمان بقى صعب وللدرجة دى الناس معندهاش شوية وقت للى بيحبوهم وبعدين دى كلها حاجات بسيطة وصغيرة يعنى مش نتعب اوى يعنى لو سمعنى حد ووقفنا جنبه فى مشكلة ليه وبرده مش هيحصلنا حاجة لما نحاول نفهم الناس الى قريبين مننا ونحاول نحسسهم بالأمان وبالحب معقولة الدنيا بقت بالسوء ده ، مهو أحنا كمان علشان كده أغلبنا عندهم أكتئاب ومخنوقين وزهقنين من الدنيا علشان مفيش حد واقف جنب حد مع أن كل واحد بيبقاله يوم يعنى أنهاردة هتقف جنبى بكرة هقف جنبك ، هى الدنيا كده لازم أحنا نبدء بالعطاء علشان يوم منحتاج نلاقى . مش كده والا أيه؟؟؟

أنا بتمنى أن كل الناس يكون فعلا عندهم حد يحسسه فعلا بالأمان ولو معندوش يعتبرنى أحد الأصدقاء ألى ممكن فعلا يحس معاهم بالأمان .

أيه رأيكم فى الشخصية المتقلبة أو المودية ؟؟؟؟؟؟؟؟؟؟

2007-08-19T23:20:00.000-07:00

صباح الخير يا كل القلوب

أنا عايزة أتكلم عن حاجة الحقيقة تعبانى جدا وهى أنى شخصية مودية جدا أكيد فى ناس هيقولولى يعنى ايه الكلام ده، أقولكم يعنى أنا شخصية من الأخرمتقلبة جدا و متعبة جدا بجد أنا بتعب نفسى وغالبا بوتروبتعب الى حوليا وده لأنى كل شوية بحالة مزاجية مختلفة ، على فكرة فى ناس كتير كده وصدقونى الى بيحصلهم ده غصب عنهم .

أنا من فترة طويلة حوالى أكتر من خمس سنين و أنا بحوال أغير من نفسى فى الموضوع ده لكن للأسف وهو ممكن يكون بيقل نسبيا لكن مش بيختفى . أصل الموضوع ده بيكون غالبا من تأثيرالحساسية الزائدة عند الأشخاص الى زى كده ، يعنى ممكن كلمة صغيرة تغير المود بسهولة لو كلمة حلوة الواحد بيكون مبسوط وهايص ولو كلمة تضايق الواحد بيقلب 180 درجة وأعوذ بالله من الخلقة الرخمة الى الناس بيشوفوها، بصراحة الناس ساعات بتصعب عليا.

والمصيبة الأكبر أن الكلام ممكن يكون ميستهالش أن الواحد ينبسط أو يتضايق بس لأنى كمان بطبعى كتومة فالواحد بيشيل جواه ويعيش بقى مع نفسه فى النكد وكل واحد بقى وحظه يا النكد يطول ياربنا يبعت الى يخفف عنه. وساعات ربنا بيبعت للواحد ناس يقولوا قدامه أى حاجة من غير مايقصدوا تخلى الواحد يرجع يحس بالهدوء ده جنان ياجماعة والله ، بجد أنا بحوالى أهدى من الموضوع ده لأنه فعلا بيعملى مشكلة فى حاجات كتير خصوصا أنى بحب الناس جدا ومسش بحب حد يزعل منى وعلشان ميزعلوش منى أقوم أسكت وأشيل جوايا لكن بيبان عليا والموضوع بيأثر عليا وبيخنقنى ولو حد جه كلمنى بهزار ممكن فى نفس التوقيت ده أرخم عليه وأضايقه ، مش بقولكم جنان.

اللطيف فى الموضوع أنى لأنى مودية ممكن على قد ما أنا متضايقة جدا ومكتئبة جدا لو عملت فى الوقت ده أى حاجة أنا بحبها فعلا مودى يتعدل بسرعة جدا، وفى الحالة دى الناس بتبصلى وتقولى انتى مش طبيعية أنتى مش كنت من 5 دقايق بس مكتئبة اه الى حصل، أقولهم مافيش خلاص الحالة راحت.

مش عارفة أنتم أيه رأيكم الحالة الى عندى جنان والا لسه شوية ، وياترى فى منكم بيحصلو كده ولو حد قدر أنه يغير الطبع ده ياريت ينصحنى ويقولى منكم نستفيد.

هل المشاعر والأحاسيس للشباب بس؟؟؟؟؟؟؟؟؟

2007-08-14T22:36:00.000-07:00

اولا أنا بشكر كل الناس الى أهتموا فعلا بالدخول والتعليق وياريت منقفش عند كده ياريت كمان كل الى ليه أصدقاء يعرفهم بالمدونة بتاعتنا علشان يكون فى أراء أكتر ومجموعتنا تزيد كمان وكمان.

دلوقتى بقى نبدأ كلامنا ، الحقيقة يا جماعة أنا قيلت لى كلمة ولغاية دلوقتى مش فاهمة ليه الناس بتعتقد كده، أحد صديقاتى لما كنت بحكلها على هدف المدونة وهو اننا نتكلم عن المشاعر الى بتحصل جوانا ضحكت اوى وقالتلى اه ده أنتى عملة المدونة دى للشباب بقى . الحقيقة انا فوجئت بالتعليق ده لأنى فى أعتقادى الشخصى المشاعر والأحاسيس ملهاش سن كلنا بنحس وبنشعر ومش معنى اننا بنكبر يبقى هنبطل نحس وألا أيه ؟

أنا بالعكس كمان شايفة أن الواحد كل أما بيكير بيكون محتاج أكتر للأحساس وأن الناس كلها تحس بألى جواه يعنى جدودنا مثلا بيحسوا جدا بالعكس جايز أكتر مننا ومشاعرهم بتكون مرهفة تجاه كل الناس وبيزعلوا وبيبسطوا وبيتضايقوا يعنى بيحسوا ليه بقى لما نقول اننا بنتكلم عن المشاعر نقتصر ده على الشباب بس.

ياجماعة ياريت نغير الفكرة دى ولو أنا كلامى غلط قولولى ، أنا فى أنتظار ردكم.

أقتراحاتكم

2007-08-14T22:30:00.000-07:00

صباح الخير

انا حبة انى بس اقول حاجة صغيرة ياريت ياجماعة اى حد عنده أى أقتراح او اى فكرة يحب ان احنا نتناقش فيها يبعتها على طول متترددوش انا اتفقت معاكم أن المدونة دى مش ليا لوحدى اعبر فيها لأ لكل الناس الى يحبوا يتكلموا وملحوظة تانية المدونة دى مش للسيدات فقط لأ لكل الناس ولكل الأعمار وبدون تفرقة.

انا كده قولت الى عندى وياريت اسمع اقتراحاتكم هكون سعيدة جدا.

الجواز عن حب والا الجواز التقليدى أحسن؟؟؟؟؟

2007-08-12T23:00:00.000-07:00

صباح الخير لكل البشر

الحقيقة ياجماعة انا امبارح طول اليل مانمتش ، طبعا كلكم اكيد هتقولوا العيال بقى هما الى منيموكيش، بس الحقيقة غير كده خالص .

الحقيقة بقى انى طول اليل بفكر ياترى انهارده هاكتب ايه فى البلوج ؟

والله ياجماعة انا مش مجنونة بس اصلى اول مرة احس ان فى مكان اقدر اتكلم فى عن الى جوايا ومش لوحدى انا نفسى اقدر اخلى كل الناس تحكى الى جواها.

المهم انا مش عايزة اصدعكم، انا فى الأخر قررت انى ابتدى معاكم الكلام انهاردة بموضوع انا شخصيا شايفاه مهم اوى: طبعا كل واحد فينا يابنات بيكون ليه فكرة خيالية عن فارس الأحلام وكل البنات بتتمنى انها تحب وبعدين تتجوز بس ياترى هل فعلا الحب قبل الجواز احسن والاالجواز التقليدى ؟ وياترى احنا بنتنازل اكتر فى الجواز الى عن حب والا فى الجواز التقليدى؟

طبعا بما انى انا الى بدات الموضوع ده يبقى لازم ارد انا الأول ، بصراحة ياجماعة انا عندى لغبطة فى الموضوع ده لأنى قبل الجواز كان عندى نفس الأمنية وفعلا اتجوزت عن حب لكنبعد الجواز اكتشفت ان الواحد مش شرط لما يحب ان حياته الزوجية تكون سعيدة لأن الواحد لما بيحب بيكون طماع وبيتوقع من الشخص الى قدامه كل حاجة كويسة زى مايكون قدامه ملاك وطبعا الواقع غير كده خالص لأن احنا مش ملائكة والرجالة هما الرجالة بيحبوا والا بيتجوزوا تقليدى هما واحد الى بتختلف هى الست ، يعنى الست لما بتكون بتحب بضحى كتير اوى وبتتنازل كتير عن حاجات هى بتحبها علشان خاطر سى السيد لكن لما بتتجوز جواز تقليدى بتاخد حقها وزيادة .

لكن من ناحية تانية برده الجواز عن حب ليه مميزاته لأن الست بتحتاج للحب والرقة والحنان ولما تكون بتحب جوزها بيهون عليها حاجات كتير خصوصا لو الزوج ده من وقت للتانى بيفكرها بالكلام الحلو والمشاعر الجميلة.

انا عموما لو اتكلمت فى الموضوع ده اكتر من كده محدش هيقول حاجة وانا اتمنى اسمع راى كل الناس.

ها انتم بقى رايكم ايه؟

أعرفكم بنفسى....

2007-08-12T08:20:00.000-07:00

انا دينا ابراهيم بشتغل ومتزوجة وعندى ولدين

واعيش كما تعيش أغلب السيدات المصريات العاملات وذوى الدخل المحدود والا كنا قعدنا فى بيوتنا.

الحقيقة جايز كتير يسألونى يعنى انتى فاضية تعملى بلوج والله ده انتى رايقة.

الحقيقة انى لقيت ناس كتير عاملين بلوج فمحبتش اكون اقل منهم يعنى ، بس الحقيقة انى عملته لسبب مهم اوى وهو انى نفسى احكى واسمع كل الأفكار والمشاعر والأحاسيس والمشاكل و.........................الى بتمر بينا كل يوم وعلى فكرة انا نفسى ان كل الى بيدخلوا هنا ميكتفوش بالقراء بس انا نفسى كلنا نحكى كل الى جوانا مش بس مشاكلنا لأ ادق المشاعر الى ممكن نحس بيها والمشاكل الى ممكن تمر بينا عاطفية،خاصة،عملية وبتهيألى اكيد هنتعلم من بعض حاجة جديدة وهنفرغ كل الطاقات والكلمات الى مبنقدرش نقولها لحد يعنى هنا المكان مفتوح لجميع القلوب.

ملحوظة:

أرجو من الجميع عدم كتابة اى شىء يقلل من شأن اى أحد او الرد بأسلوب غير محترم وشكرا